काठमाडौं- नेपाली कांग्रेसको शेरबहादुर देउवा समूहका कार्यवाहक सभापति पूर्णबहादुर खड्काले विशेष महाधिवेशनलाई विखण्डनको थलो भनेका छन्।

शुक्रबार पार्टी केन्द्रीय कार्यालय सानेपामा आयोजित पत्ररका सम्मेलनमा बोल्दै उनले यस्तो बताएका हुन् ।

‘विशेष महाधिवेशनको भेलामा लागेका पदाधिकारीहरूसँग विभिन्न चरणमा कुरा गर्‍यौँ’, उनले गगन थापा र विश्वप्रकाश शर्मातिर लक्षित गर्दै भने, ‘विशेष महाधिवेशन भनेको पार्टीलाई विखण्डन ल्याउने थलो हो । विशेष महाधिवेशनले पार्टी फुटाउने काम गरेको छ।’

सभापति देउवाले फागुन २१ को चुनावको टिकटको निर्णयबारे मनाउन खोज्दा पनि विशेष महाधिवेशन पक्षधर नमानेको बताए ।

‘तपाईंहरूकै कार्यसमितिकै निर्णयको आधारमा मेरो सही चल्छ । तपाईंहरू निर्णय गर्नुस्, म सही मात्रै गरौँला भनेर सभापतिले भन्नु भएको थियो’, उनले भने, ‘केन्द्रीय कार्यसमितिले मात्रै विशेष महाधिवेशन बोलाउन र कार्यनीति बनाउन पाउँछ । विधानको केन्द्र भनेको केन्द्रीय कार्यसमिति र केन्द्रीय कार्यालय हो । त्यसैले त्यो विशेष महाधिवेशन विधानविपरीत छ ।’

उनले विशेष महाधिवेशन पार्टीलाई क्षति पुर्‍याउने गरी गरिएको बताए । ‘विधानसम्मत नभएकाले केन्द्रीय कार्यसमिति बैठकले अवैधानिक भेला र विशेष महाधिवेशनमा सहभागी नहुन आह्वान गरेको थियो’, उनले भने ।