काठमाडौं- काठमाडौं महानगरपालिकाका नगर प्रहरी प्रमुख राजुनाथ पाण्डेले राजीनामा दिएका छन् ।

मेयर बालेन्द्र साहको सहयोगीका रुपमा महानगरमा सक्रिय उनले शुक्रबार पदबाट राजीनामा दिएका हुन् ।

उनले आगामी फागुन २१ गते हुन लागेको प्रतिनिधिसभा निर्वाचनमा राष्ट्रिय स्वतन्त्र पार्टीबाट चुनाव लड्ने गरी राजीनामा दिएका हुन् ।

पाण्डेले काठमाडौं क्षेत्र नम्बर ४ बाट उठ्ने बताउँदै आएका छन् । जहाँबाट नेपाली कांग्रेसका नवनिर्वाचित सभापति गगनकुमार थापाले लगातार जित्दै आएका छन् ।

बालेन्द्र झापा क्षेत्र नम्बर ५ बाट उठ्न लागेको चर्चाबीच पाण्डेले पद छाडेका हुन्। बालेन्द्रले पनि शनिबार या आइतबारसम्ममा मेयर पद त्याग्ने तयारी गरेका छन् ।

बालेन्द्र अहिले रास्वपाको वरिष्ठ नेता छन् । उनलाई रास्वपाले भावी प्रधानमन्त्री भन्दै चुनावमा उठाउने तयारी गरेको छ।