काठमाडौं – राष्ट्रिय स्वतन्त्र पार्टीको समानुपातिकतर्फ उम्मेद्वारी दिएका गायक प्रकाश सुपतले महोत्सवको व्यस्त तालिका सार्वजनिक गरेका छन् ।

प्रकाशले माघ १ देखि ११ गतेसम्मको महोत्सव तालिका सार्वजनिक गरेका छन् । जसमा उनले १ देखि ९ गतेसम्म लगातार सांगीतिक प्रस्तुती दिनेछन् । १० गते छाडेर उनी ११ गते सिन्धुलीमा साङ्गीतिक प्रस्तुती दिँदै छन् । ११ दिनमा उनी १० फरक स्थानका मञ्चमा देखिनेछन् । यो गायकको राम्रो व्यस्तता हो ।

प्रकाशले माघ १ गते बिहीबार अर्घाखाँचीको सन्धिखर्कमा प्रस्तुती दिएका थिए । आज शुक्रबार उनले नवलपरासीमा प्रस्तुती दिँदैछन् । माघ ३ मा पोखरा, ४ मा स्याङ्जा, ५ मा कञ्चनपुर, ६ मा बर्दिया, ७ मा बासगढी, ८ मा कैलाली र ९ मा दाङ प्रस्तुती दिँदैछन् ।

सङ्गीतमा कम सक्रिय भएर गत वर्षदेखि फिल्ममा लागेपछि मञ्चमा उनी पहिलो पटक व्यस्त देखिएका हुन् ।

११ गतेसम्मको भेट पूर्ण साङ्गीतिक रहेने उनले दर्शकलाई बताएका छन् । त्यसपछि भने आफू फरक भूमिका र जिम्मेवारीको यात्रा लाग्ने सम्भावना उनले देखाएका छन् ।

उनले लेखेका छन्, ‘१२ देखि २१ को यात्रा फरक भूमिका र जिम्मेवारीको हुनसक्छ ।’

अर्थात्, महोत्सव यात्रा सकेर राजनीतिमा सक्रिय हुने उनले सङ्केत गरेका हुन् । फागुन २१ गते निर्वाचन तोकिएको छ ।

उनी रास्वपामा प्रवेश गरे पनि सक्रिय रुपमा हिँडेका छैनन् । अब भने चुनाव केन्द्रित भइ राजनीतिमा सक्रिय हुन लागेको उनको सङ्केतले बुझाउँछ ।