काठमाडौं– नेपाल चिकित्सक संघ (एनएमए) को निर्वाचन कार्यक्रम स्थगित गरिएको छ । संघको निर्वाचन सम्बन्धमा पाटन उच्च अदालतबाट जारी भएको अन्तरिम आदेशलाई मध्यनजर गर्दै पूर्वनिर्धारित तालिकाअनुसार भइरहेको सम्पूर्ण निर्वाचन कार्यक्रम रोकिएको निर्वाचन समितिले जनाएको छ।

निर्वाचन समितिद्वारा जारी सूचनामा अदालतको आदेश कार्यान्वयन गर्नुपर्ने बाध्यताका कारण निर्वाचन प्रक्रिया हालका लागि स्थगित गरिएको उल्लेख छ। साथै, यस सम्बन्धमा आगामी दिनमा निर्वाचन समितिबाट आवश्यक छलफलपछि नयाँ सूचना जारी गरी निर्वाचनसम्बन्धी संशोधित तालिका सार्वजनिक गरिने जनाइएको छ।

निर्वाचन समितिका प्रमुख निर्वाचन अधिकृत डा.प्रणय रत्न शाक्यद्वारा हस्ताक्षरित सूचनामा हालको अवस्था समाधान नभएसम्म निर्वाचनसम्बन्धी कुनै पनि कार्यक्रम अगाडि नबढाइने स्पष्ट पारिएको छ । 

नेपाल चिकित्सक संघको केन्द्रीय निर्वाचनका साथै विभिन्न तहका नेतृत्व चयनका लागि प्रक्रिया अघि बढिरहेको अवस्थामा अदालतको आदेशपछि निर्वाचन अनिश्चित बनेको हो । 

यसले संघभित्रको नेतृत्व चयन प्रक्रिया केही समयका लागि प्रभावित हुने देखिएको छ ।