काठमाडौं– राष्ट्रिय स्वतन्त्र पार्टी (रास्वपा) का नेता धनेज थापाको गाडीमा तोडफोड गरिएको छ। गोरखाको भिमसेन थापा गाउँपालिका वडा नम्बर ३ कमलटारमा पार्किङ गरिएको अवस्थामा थापाको बागमती प्रदेश ०२५ च ७०३० नम्बरको गाडीमा तोडफोड भएको हो।

वडाअधिवेशनमा सहभागी हुन पार्टीका केन्द्रीय सदस्यद्वय प्रकाशन्द्र परियार र धनेज थापा तथा पर्यटन विभाग सदस्य प्रकाश लामिछानेसहितको टोली कमलटार पुगेको थियो। सोही क्रममा पार्किङ स्थलमै गाडीमा तोडफोड गरिएको जनाइएको छ।

रास्वपाले घटनालाई गम्भीर रूपमा लिँदै सम्भावित राजनीतिक प्रपञ्च, षड्यन्त्र, प्रतिशोध र हुलदङ्गीको आशंकासहित प्रहरीमा उजुरी दर्ता गरिसकेको जनाएको छ। टोलीमा सहभागी केन्द्रीय सदस्य परियारले सामाजिक सञ्जालमार्फत आफूहरू सुरक्षित रहेको जानकारी दिएका छन्।

घटनाका कारण कार्यक्रम केही ढिलो भए पनि आयोजक टोली कार्यक्रम स्थलमा पुगेर अन्तिम तयारीमा जुटेको र वडाअधिवेशन स्थगित नहुने जनाइएको छ।