काठमाडौँ – राष्ट्रिय स्वतन्त्र पार्टी (रास्वपा) ले बडादसैँ, तिहार, नेपाल संवत् तथा छठ पर्वका अवसरमा स्वदेश तथा विदेशमा रहेका सम्पूर्ण नेपालीमा सुख, शान्ति, सुस्वास्थ्य र समृद्धिको शुभकामना व्यक्त गरेको छ।

पार्टीका महामन्त्री विपिन कुमार आचार्यले शुक्रबार विज्ञप्ति जारी गर्दृै चाडपर्वका अवसरमा शुभकामना आदानप्रदान गर्दा उपहार, नगद, जिन्सी वा अन्य कुनै पनि प्रकारका सुविधा लिने-दिने कार्य नगर्न र नगराउन अपिल गरेका हुन् ।

स्थापनाकालदेखि नै यस्ता कार्यलाई निरुरुत्साहित गर्दै आएको उल्लेख गर्दै रास्वपाले यस मान्यतामा आफूहरू अडिग रहेको र सबैलाई यसको अनुसरण गर्न आग्रह गरेको छ।

विज्ञप्तिमा भनिएको छ, “चाडपर्वमा हामी जसरी परिवार र आफन्तबाट केवल आशीर्वादको अपेक्षा गर्छौँ, त्यसरी नै राजनीतिमा पनि हाम्रा लागि नागरिक र अन्य सबैको सद्भाव, आशीर्वाद र विश्वास नै सबैभन्दा ठूलो उपहार हो।”

रास्वपाले मर्यादित, सुसंस्कृत र भरोसायोग्य राजनीतिक संस्कार निर्माणका लागि सबैको साथ र सहयोगको अपेक्षासमेत गरेको छ।