काठमाडौं– राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीभित्रको आन्तरिक लोकतन्त्र बलियो रहेको बताएका छन्।

सर्वदलीय बैठकपछि सञ्चारकर्मीहरूले सरकार ‘गुण्डागर्दी शैलीमा चलिरहेको’ भन्ने आरोपबारे प्रश्न गरेपछि लामिछानेले पार्टीभित्र फरक–फरक ढंगले लोकतान्त्रिक अधिकार प्रयोग भइरहेको बताएका हुन्।

सदनमा रास्वपाका सांसद अमरेशकुमार सिंहले सरकार ‘गुण्डागर्दी शैलीमा’ सञ्चालन भइरहेको आरोप लगाएपछि पत्रकारहरूले लामिछानेसँग त्यसबारे प्रतिक्रिया मागेका थिए।

जवाफमा लामिछानेले भने, ‘पार्टीको आन्तरिक लोकतन्त्र बलियो छ। त्यसलाई कसैले भरपुर रूपमा प्रयोग गर्नुभयो होला, कसैले कम प्रयोग गर्नुभयो होला। त्यसलाई त्यसरी बुझिदिनुहोला।’

सरकार पनि त्यही शैलीमा सञ्चालन भइरहेको भए पार्टीले प्रश्न उठाउने उनको भनाइ थियो। ‘सरकार यदि त्यस्तै शैलीमा चलेको भए त हामी पनि प्रश्न गरिहाल्थ्यौँ नि,’ उनले भने।

लामिछानेले सरकारले आफ्नो काम तीव्र गतिमा अघि बढाइरहेको र पार्टीले पनि आफ्नो जिम्मेवारीअनुसार काम गरिरहेको दाबी गरे। सरकार र पार्टीबीच समन्वयमै काम भइरहेको उल्लेख गर्दै उनले अनावश्यक विषयमा समय खर्च नगर्न आग्रह गरे।

‘सरकारले आफ्नो काम द्रुत गतिमा गरिरहेको छ, पार्टीले पनि आफ्नो काम गरिरहेको छ। समन्वयमै काम भइरहेको छ। अनावश्यक कुरालाई नहेरिदिनुहोला, समय बर्बाद नगर्नुहोला,’ उनले भने।

सर्वदलीय बैठकले उठाएका विषयलाई सरकारले अपनत्व नलिएको अवस्थामा के हुन्छ भन्ने प्रश्नमा पनि लामिछानेले सरकार त्यस्तो दिशामा नरहेको बताए। उनका अनुसार सर्वदलीय बैठक र त्यसबाट आएका विषयलाई सरकारले बेवास्ता गर्ने अवस्था नरहेको उनको भनाइ थियो।