काठमाडौं- सत्तारूढ राष्ट्रिय स्वतन्त्र पार्टीका सांसद रमेश प्रसाईंले बाढीको विपद्का बेला बजारमा उदण्डता देखिएको भन्दै महँगी नियन्त्रणमा सरकार असफल भएको टिप्पणी गरेका छन् ।

बुधबार प्रतिनिधि सभा बैठकमा बोल्दै उनले आफ्नै पार्टीको सरकारका पालामा महँगीले ‘अग्रगामी छलाङ’ लगाएको बताए ।

‘प्याज, चिनी, चामल र तेल हरेक चिजको भाउ आकाशियो । चिल्ला गाडी चढ्नेलाई त महँगीले फरक परेन, तर हामीजस्ताको ढाड नै सेकियो,’ उनले भने ।

नवनियुक्त उद्योगमन्त्री दीपककुमार साहलाई शुभकामना दिँदै प्रसाईंले कालोबजारी नियन्त्रणमा प्रभावकारी भूमिका निर्वाह गर्न आग्रह गरे ।

‘नयाँ जोगीले धेरै खरानी घस्छ भनेजस्तो नभई कालोबजारी नियन्त्रणका लागि साँच्चिकै नयाँ किसिमको भूमिका निर्वाह गर्न सक्नुहोस् भन्ने कामना गर्छु,’ उनले भने ।

प्रसाईंले फरक प्रसङ्गमा राजधानी काठमाडौं सहरका सार्वजनिक सवारीसाधनमा क्षमताभन्दा बढी यात्रु ओसार्ने क्रम बढेको भन्दै गृह र यातायात मन्त्रालयको ध्यानाकर्षण गराए ।

‘राजधानीका सवारीसाधनमा भेडा-बाख्रा कोचेजसरी यात्रु ओसारिँदैछ। क्षमताभन्दा बढी मान्छे ओसारिँदैछ। यात्रुहरूले दैनिक दुःख पाएका छन्। के राजधानीमा पनि ट्राफिक व्यवस्थापन गर्न सरकारले नसकेको हो र ?’ उनले प्रश्न गरे ।