काठमाडौं- अख्तियार दुरुपयोग अनुसन्धान आयोगले सोलुखुम्बुको सोताङ गाउँपालिकाकी उपाध्यक्ष अन्जु नाछिरिङ राई र उनका छोराविरुद्ध भ्रष्टाचार मुद्दा दायर गरेको छ ।

आर्थिक वर्ष २०८०/८१ मा सञ्चालित ९० कार्यदिनको ढाका सिलाइ–बुनाइ तालिममा प्रशिक्षकको रूपमा काम दिलाएबापत उपाध्यक्ष राईले छोरा सुनिल नाछिरिङ राईको बैंक खातामा क्युआर कोडमार्फत् ४५ हजार रुपैयाँ घुस मागेकी थिइन् ।

उक्त रकम छोरा सुनिलको बैंक खाताको क्यूआर कोडमा जम्मा गर्न लगाएको अनुसन्धानबाट खुलेको अख्तियारले जनाएको छ ।

अख्तियारले उपाध्यक्ष अन्जुलाई भ्रष्टाचार निवारण ऐन, २०५९ को दफा ३(१) को देहाय (क) बमोजिम कारबाहीको माग गर्दै ४५ हजार रुपैयाँ बिगो कायम गरेको छ ।

त्यस्तै, सुनिलले आमासँगको मिलेमतोमा रकम लिएर प्रयोग गरेको भन्दै उनीविरुद्ध पनि सोही बिगो कायम गरी भ्रष्टाचार निवारण ऐनको दफा ३(२) बमोजिम सजाय मागदाबी गरिएको छ ।