काठमाडौँ – एलेक्सिस म्याक एलिस्टर, कोडी ग्याक्पो र डोमिनिक सोबोस्लाइको गोलमद्दतमा लिभरपुलले इङ्लिस लिग कपको तेस्रो चरणमा टोटनह्याम हट्सपरलाई ३–१ गोल अन्तरले पराजित गरेको छ। जितसँगै लिभरपुल प्रतियोगिताको चौथो चरणमा प्रवेश गरेको छ।

मंगलबार राति सम्पन्न खेलमा लिभरपुलले सुरुवाती समयदेखि नै टोटनह्याममाथि दबाब बनाएको थियो। खेलको २१ औँ मिनेटमा म्याक एलिस्टरले गोल गर्दै घरेलु टोली लिभरपुललाई सुरुवाती अग्रता दिलाएका थिए। पहिलो हाफमा १–० ले अघि रहेको लिभरपुलका लागि ५४ औँ मिनेटमा ग्याक्पोले म्याक एलिस्टरको पासमा गोल गर्दै टोलीको अग्रता दोब्बर बनाए।

टोटनह्यामका लागि ६९ औँ मिनेटमा कनर ग्यालाघरले म्याथ्युज फर्नान्डेजको पासमा एक गोल फर्काउँदै खेलमा फर्किने प्रयास गरेका थिए। तर, दोस्रो हाफको इन्जुरी समय (९०+१ मिनेट) मा सोबोस्लाइले ग्याक्पोको पासलाई गोलमा परिणत गरेपछि लिभरपुलले ३–१ को सहज जित पक्का गर्‍यो।