काठमाडौं- नेपाली कांग्रेस संस्थापन इतर पक्षको राष्ट्रिय भेला समापनका दिन पूर्व कार्यवाहक सभापति पूर्णबहादुर खड्का गयल देखिए।

करिब साढे ५ महिना विदेश बसाइपछि फर्किएका पूर्वसभापति शेरबहादुर देउवाको नेतृत्वमा आयोजना गरिएको राष्ट्रिय भेलाको समापनमा खड्का नदेखिएका हुन्।

उद्घाटन सत्रमा पुगेर देउवाको नेतृत्वमै पन्ध्रौँ महाधिवेशन सफल बनाउनुपर्ने धारणा राखेका खड्का समापन कार्यक्रममा नदेखिएपछि विभिन्न शंका-उपशंका भएको छ।

उनलाई २०८२ भदौ २३ र २४ को जेन-जी आन्दोलनपछि शेरबहादुर देउवाले कार्यवाहक सभापतिको जिम्मेवारी दिएका थिए। तर पछि राष्ट्रिय भेला आयोजना गर्दा बीपी कोइरालाका पुत्र डा. शशांक कोइरालाको नेतृत्वमा भएपछि खड्का असन्तुष्ट भएको हुन सक्ने अनुमान गरेका छन् ।

तर उनीनिकट नेताहरूले खड्का पार्टी विभाजनको पक्षमा नरहेका कारण भेलाको समापानमा नगएको बताएका छन्।

उसो त कांग्रेस नेता डा. शेखर कोइराला पनि समापन कार्यक्रममा पुगेनन् । तर गगनले विशेष महाधिवेशन गरेपछि मात्रै शेखर बाध्यतालले देउवा समूहमा जोडिएका हुन् ।

शेखरभन्दा खड्का नपुग्नुलाई अर्थपूर्ण मानिएको छ। खड्कानिकट स्रोतका अनुसार राष्ट्रिय भेलाबारेमै उनले असहमति राखेका थिए। तर देउवाको मन राख्न उनी भेलामा पुगेको उनीनिकटले बताएका छन् ।

देउवा पक्ष भने शशांकलाई नेतृत्व मानेर अगाडि बढ्न नसकेका कारण खड्का नपुगेको दाबी गर्छन् । स्वास्थ्य अवस्था पनि ठिकै रहे पनि खड्का भेलामा नपुग्नुलाई गम्भीर अर्थपूर्ण मानिएको छ। खड्काले यसबीचमा सभापति गगन थापासँग संवाद गरेको पनि खुलेको छ। गगनसँग उनकी असन्तुष्ट थिए। तर उनले पछिल्लो समय संवादको ढोका खोलेर पार्टी फुटाउने पक्षमा उभिएको बताइन्छ।