काठमाडौं– राष्ट्रिय प्रजातन्त्र पार्टी (राप्रपा)को नवलपरासी (बर्दघाट सुस्ता पश्चिम) जिल्ला अध्यक्षमा रामभवन यादव निर्वाचित भएका छन्।

जिल्ला अधिवेशनमा चार जना उम्मेदवारबीच प्रतिस्पर्धा भएको थियो। प्रतिस्पर्धाबाट यादव जिल्ला अध्यक्षमा निर्वाचित भएका हुन्। राप्रपा अध्यक्ष राजेन्द्र लिङ्देनले शनिबार सुनवलमा जिल्ला अधिवेशनको उद्घाटन गरेका थिए।

यसैगरी, राप्रपाको नागार्जुन नगरपालिका अधिवेशनबाट महेश रिमाल सर्वसम्मत रूपमा अध्यक्ष पदमा निर्वाचित भएका छन्। रिमाल नागार्जुन नगरपालिका–५ का वडाध्यक्षसमेत हुन्। उनी बहालवाला जनप्रतिनिधि हुन्। रिमाल यसअघि पनि सोही वडाको अध्यक्षमा निर्वाचित भएका थिए।

राप्रपाले आगामी मंसिर २६, २७ र २८ गते महाधिवेशन गर्ने निर्णय गरिसकेको छ। महाधिवेशनलाई लक्षित गर्दै पार्टीले भदौ मसान्तसम्म सबै स्थानीय तह र जिल्लाको अधिवेशन सम्पन्न गर्ने कार्यतालिका बनाएको छ।