इस्लामाबाद: पाकिस्तानमा वर्षौंदेखिको कमजोर जल व्यवस्थापनका कारण गम्भीर संकट उत्पन्न हुने खतरा बढेको छ । विशेषज्ञहरूका अनुसार हरेक वर्ष अर्बौं ग्यालन वर्षाको पानी जमिनमुनि रिस-एर भण्डार बढाउनुको सट्टा ढल र नदीहरूमा खेर गइरहेको द एक्सप्रेस ट्रिब्यूनले जनाएको छ।

विशेषज्ञहरूले पञ्जाबको भूमिगत जलस्तर डरलाग्दो गतिले घटिरहेको चेतावनी दिएका छन् । अनियन्त्रित सहरीकरण, अत्यधिक मात्रामा भूमिगत पानीको दोहन, सिमेन्टका संरचनाहरूको विस्तार र बढ्दो जल मागका कारण लाहोरको जलस्तरमा निरन्तर गिरावट आएको छ । पञ्जाब विश्वविद्यालयका जल स्रोत विशेषज्ञ मुहम्मद यासिनका अनुसार लाहोरमा भूमिगत जलस्तर बर्सेनि करिब एकदेखि डेढ मिटरसम्म घटिरहेको छ ।

तीव्र निर्माण कार्यले सहरको प्राकृतिक रूपमा पानी सोस्ने क्षमतालाई घटाएको छ । उनले वर्षाको पानी संकलन गर्ने इनार, फिल्ट्रेसन पिट, बायोस्केल र इन्फिल्ट्रेशन प्रणालीजस्ता प्रविधिहरू अपनाएमा भूमिगत पानी पुनर्भरण गर्न र भारी वर्षाका बेला सहरी बाढीको समस्या कम गर्न सकिने बताएका छन् ।

यसैबीच, पञ्जाब विश्वविद्यालय र डब्लूडब्ल्यूएफ-पाकिस्तानले संयुक्त रूपमा वर्षाको पानी संकलन र भूमिगत जल पुनर्भरण परियोजना सुरु गरेका छन्। यो परियोजनाले छानो र सतहमा बग्ने पानीलाई प्रशोधन प्रणालीमार्फत छानेर पुनः जमिनमुनिको जलभण्डारमा पठाउने गर्दछ, जुन जल संरक्षणका लागि एक व्यावहारिक नमूना साबित भएको छ ।