एजेन्सी- कुवेत र बहराइनले बुधबार इरानबाट गरिएका हवाई आक्रमणहरू आफ्नो हवाई प्रतिरक्षा प्रणालीमार्फत विफल पारेको दाबी गरेका छन्। इरान र अमेरिकाबीच होर्मुज जलसन्धिलाई केन्द्रमा राखेर सैन्य तनाव चर्किरहेका बेला यी घटनाहरू भएका हुन्।

कुवेतको सेनाले इरानबाट प्रहार गरिएका ड्रोनहरू अवरोध गरी नष्ट गरिएको जनाएको छ। सेनाले उक्त घटनालाई ‘इरानको आक्रामक गतिविधि’को परिणाम भन्दै निन्दासमेत गरेको छ।

यस्तै, बहराइनको सेनाले पनि इरानबाट गरिएका बहुविध हवाई आक्रमणहरू सफलतापूर्वक अवरोध गरी निष्क्रिय बनाइएको जनाएको छ।

यसअघि बुधबार बिहान बहराइनको गृह मन्त्रालयले क्षेप्यास्त्र तथा हवाई आक्रमणको चेतावनीस्वरूप साइरन बजाउँदै नागरिक तथा बासिन्दालाई शान्त रहन र नजिकको सुरक्षित स्थानमा जान आग्रह गरेको थियो।

उता, इरानको सरकारी सञ्चारमाध्यमले भने अमेरिकी सेनाले इरानमाथि आक्रमण गरेपछि त्यसको प्रतिकारस्वरूप इरानले कुवेतस्थित अमेरिकी सैन्य लक्ष्य तथा बहराइनमा रहेको अमेरिकी पाँचौँ नौसैनिक बेडालाई लक्षित गरी छुट्टाछुट्टै आक्रमण गरेको दाबी गरेको छ।

यद्यपि, इरानको दाबीबारे अमेरिकी पक्षबाट तत्काल कुनै आधिकारिक प्रतिक्रिया आएको छैन।