एजेन्सी – अमेरिकी राष्ट्रपति डोनाल्ड ट्रम्पले इरान वार्तामा फर्किन तयार नभए अर्को सातादेखि इरानका पुल र विद्युत् उत्पादन केन्द्रमा आक्रमण गर्ने चेतावनी दिएका छन्।

फक्स न्युजसँगको एक अन्तर्वार्तामा ट्रम्पले भने, ‘यदि उनीहरू वार्ताको टेबलमा आएनन् भने अर्को साता अवस्था उनीहरूका लागि निकै खराब हुनेछ। हामी उनीहरूका सबै विद्युत् केन्द्र र पुलहरू ध्वस्त पार्नेछौं’ ।

यो अभिव्यक्ति अमेरिका र इरानबीच लगातार चौथो दिनसम्म आक्रमण र प्रतिआक्रमण जारी रहेका बेला आएको हो। ट्रम्पले यसअघि हर्मुज जलमार्ग हुँदै हुने मालवाहक जहाजमा २० प्रतिशत शुल्क लगाउने घोषणा फिर्ता लिए पनि इरानी बन्दरगाहमाथिको नौसैनिक नाकाबन्दी भने जारी राखेका छन्।

अमेरिकी सेनाको सेन्ट्रल कमाण्ड (सेन्टकम) ले हर्मुज जलमार्ग आसपासका इरानी सैन्य संरचनामाथि दर्जनौं आक्रमण गरी व्यापारिक जहाजलाई लक्षित हुने खतरा कम गर्ने उद्देश्य रहेको जनाएको छ। इरानका अनुसार दक्षिणपूर्वी बामपुरस्थित सैन्य अड्डामाथिको अमेरिकी आक्रमणमा कम्तीमा सात सैनिक मारिएका छन्।

यसैबीच, इरानले जोर्डन, कुवेत र बहराइनस्थित अमेरिकी सैन्य लक्ष्यहरूमा मिसाइल र ड्रोन प्रहार गरेको दाबी गरेको छ। कुवेत र बहराइनले भने आफ्ना हवाई प्रतिरक्षा प्रणालीले अधिकांश आक्रमण निष्क्रिय पारेको बताएका छन्।

सेन्टकमले इरानले सात वटा व्यापारिक जहाजलाई लक्षित गरी आक्रमण गर्दा करिब एक दर्जन नागरिक चालकदलका सदस्य मारिएको, घाइते भएको वा बेपत्ता भएको आरोप पनि लगाएको छ। 

संयुक्त अरब इमिरेट्स (यूएई) ले आफ्ना दुई तेल ट्याङ्करमा इरानी क्रुज मिसाइल प्रहार हुँदा एक भारतीय चालकदल सदस्यको मृत्यु भएको र आठ जना घाइते भएको जनाएको छ। इरानको इस्लामिक रिभोलुसनरी गार्ड्स (आईआरजीसी) ले ती ट्याङ्करले चेतावनी बेवास्ता गरेको र नेभिगेसन प्रणाली बन्द गरेर बारुद बिछ्याइएको मार्ग प्रयोग गर्न खोजेकाले कारबाही गरिएको दाबी गरेको छ।

हर्मुज जलमार्गमा तनाव बढेसँगै तेल ढुवानी गर्ने जहाजहरूको आवतजावत उल्लेख्य रूपमा घटेको छ भने अन्तर्राष्ट्रिय बजारमा कच्चा तेलको मूल्य पनि उकालो लागेको छ।