काठमाडौं– प्रतिनिधिसभा बैठकमा विपक्षी दलका सांसदहरूले विरोध कायमै राखेका छन् ।

सीमासम्बन्धी प्रधानमन्त्रीको अभिव्यक्ति सच्चाउनुपर्ने माग राख्दै निरन्तर विरोधमा रहेका विपक्षी दलका सांसदहरूले बुधबार पनि संसद् बैठक सुरु हुने बित्तिकै उठेर विरोध जनाएका थिए ।

विपक्षी दलका सांसदले उठेर विरोध जनाएपछि सभामुख डोल प्रसाद अर्यालले कांग्रेस सांसद गीता गुरुङलाई बोल्न समय दिएका थिए ।

सांसद गुरुङले प्रधानमन्त्री संसदप्रति उत्तरदायी हुनुपर्ने भन्दै प्रधानमन्त्रीलाई सदनमा उपस्थित गराएर सांसदहरूका प्रश्नको जबाफ दिन सभामुखमार्फत रुलिङको माग गरिन् ।

उनले नयाँ पुस्ताको प्रतिनिधित्व गर्दै प्रधानमन्त्री बनेका व्यक्तिबाट देशका युवाहरूले ठूलो आशा राखेको, तर पुरानो राजनीतिक शैलीभन्दा फरक नेतृत्व दिन नसक्दा त्यो आशा बिस्तारै निराशामा बदलिँदै गएको उनले बताइन् । उनले प्रश्न उठ्दा स्टण्टले छोपेर विषयान्तर गर्ने शैली अब पुरानो भइसकेको टिप्पणी गरिन् ।  

सांसद गुरुङले सुकुम्वासीहरूलाई स्थानान्तरण गर्ने नाममा विना तयारी डुबान क्षेत्रमा राखिएको र सरकारको अव्यवहारिक नीतिका कारण ९ जनाको मृत्यु भइसकेको उल्लेख गरिन् । 

त्यस्तै अन्य विपक्षी दलका सांसदहरूले सीमाका विषयमा प्रधानमन्त्रीको अभिव्यक्ति सच्चाउनुपर्ने माग कायमै रहेको जनाएका छन् ।