काठमाडौँ – राष्ट्रिय स्वतन्त्र पार्टी (रास्वपा) का केन्द्रीय सदस्य मनीष झाले सञ्चार गृहलगायतका स्थानमा गाडी तेर्स्याएर अवरोध गर्ने कार्य गलत भएको भन्दै आपत्ति जनाएका छन्। सामाजिक सञ्जाल फेसबुकमार्फत उनले यस्ता गतिविधिमा संलग्नमाथि अनुसन्धान र कारबाहीको माग गरेका छन्।

सञ्चार गृहलगायतका स्थानमा गाडी राखेर अवरोध गर्ने काम गलत भएको उल्लेख गर्दै उनले भनेका छन्, “यसमा जो संलग्न छ, अनुसन्धान र कारबाही हुनुपर्छ। राज्यले नागरिकको चिन्ता निराकरण गर्ने हो। राज्यले आफैँ थप आतङ्कित बनाउने होइन।”

झाले सरकारको कार्यशैलीप्रति लक्षित गर्दै प्रश्न गरेका छन्, “यस्तो बचपना देखाएर राजकाज चल्छ र ? के यस्तै स्तरहीन र गलत प्रयोग गर्न जेनजी सहादत भएको हो ?”

उनले यस किसिमको अराजक कार्यप्रति आफ्नो घोर आपत्ति रहेको समेत स्पष्ट पारेका छन्।