काठमाडौं– नेपाली कम्युनिस्ट पार्टी (नेकपा) का सांसद महेन्द्र बहादुर शाहीले यसअघिका सरकारहरूले गरेको गलत कामको छानबिन गर्न सरकारलाई चुनौती दिएका छन् । 

सोमबार संसद् भवनमा सञ्चारकर्मीसँग कुरा गर्दै सांसद शाहीले सरकारका मन्त्रीहरूले आफ्नो कमजोरी ढाकछोप गर्न यसअघिका सरकारहरूले पनि गलत गरेको आरोप लगाइरहेको भन्दै गलत कामको छानबिन गर्न सरकारलाई चुनौती दिएका हुन् ।

उनले सरकारको नेतृत्वमा बसेका मान्छेहरूले धम्कीको भाषा प्रयोग गर्न नसुहाउने बताए । अगाडिका सरकारहरूले नियम कानुन संविधान विपरीत काम गरेको भए छानबिनगरि कानुनी कारबाहीको दायरामा ल्याउने दायित्व र जिम्मेवारी सरकारको भएको उनको भनाइ छ ।

उनले सरकारमा बसेकाहरूले गल्ती गर्न नहुने भन्दै गल्ती भएका विषयमा सरकारले जनतालाई जवाफ दिन सक्नुपर्ने बताए । 

सांसद शाहीले दुई तिहाइको नजिक पुगेको सरकारले जनताको अपेक्षा अनुसार देशको विकासमा ध्यान केन्द्रित गर्नुपर्नेमा जोड दिए ।

स्वदेशमै नै उत्पादनका स्रोतहरू पहिचान गर्ने, लगानी केन्द्रित गर्ने, रोजगारी सिर्जना गर्ने, विगतमा भएका भ्रष्टाचारका प्रकरणको छानबिन लगायतका विषयमा प्रतिपक्षी दल भए पनि सरकारको साथमा रहने उनले बताए ।