तेल अभिभ- इजरायलको डेमोक्रेट्स पार्टीका प्रमुख याइर गोलानले अमेरिका र इरानबीच भएको प्रारम्भिक शान्ति सम्झौताको आलोचना गरेका छन्।

उनले यसलाई इजरायलका लागि प्रतिकूल भएको बताएका छन्। गोलानले इजरायली वायुसेना र सेनाले हासिल गरेका सैन्य उपलब्धि सम्झौतापछि अर्थहीन बनेको दाबी गरे।

यो सम्झौताका क्रममा प्रधानमन्त्री बेन्जामिन नेतन्याहू सम्पूर्ण प्रक्रियामा कमजोर, अलग-थलग र प्रभावहीन देखिएको पनि आरोप लगाए।

नेतन्याहूले इरानविरुद्ध विजयको वाचा गरे पनि अन्ततः इरान झन् बलियो र इजरायल कमजोर अवस्थामा पुगेको टिप्पणी पनि उनले गरे।

हालसम्म इजरायली सरकारले अमेरिका–इरान सम्झौताबारे औपचारिक प्रतिक्रिया दिएको छैन।

तर इजरायली अधिकारीहरू सम्झौताका विभिन्न प्रावधानप्रति चिन्तित रहेको बताइएको छ।

अमेरिका र इजरायलले संयुक्त रूपमा सुरू गरेको सैन्य अभियानपछि भएको वार्तामा इजरायललाई सहभागी नगराइएकाले पनि तेल अभिभ असहज रहेको जनाइएको छ।

सम्झौतामा समेटिएका प्रावधानहरूले इरानको आणविक कार्यक्रम पूर्ण रूपमा अन्त्य गर्ने, उसको ब्यालिस्टिक मिसाइल क्षमता कमजोर बनाउने, इरान समर्थित समूहहरूको वित्तीय तथा सैन्य सहयोग रोक्ने तथा तेहरानमाथि थप दबाब सिर्जना गर्ने जस्ता अमेरिका–इजरायलका प्रारम्भिक उद्देश्य पूरा नगरेको विश्लेषण गरिएको छ।