काठमाडौँ – वैकल्पिक खेलाडीका रूपमा मैदान छिरेका म्यानचेस्टर युनाइटेडका अमद डियालोले खेलको अन्तिम मिनेटमा निर्णायक गोल गरेपछि आइभोरी कोस्टले फिफा विश्वकपमा इक्वेडरमाथि रोमाञ्चक जित हात पारेको छ । समूह ‘ई’ को खेलमा आइभोरी कोस्टले बलियो प्रतिद्वन्द्वी इक्वेडरलाई पराजित गर्दै विश्वकपमा सुखद सुरुवात गरेको हो ।

यो हारसँगै इक्वेडरको विगत १९ खेलदेखिको अपराजित यात्रामा समेत पूर्णविराम लागेको छ । १२ वर्षपछि पहिलो पटक विश्वकप फुटबल खेलिरहेको अफ्रिकन राष्ट्र आइभोरी कोस्टका लागि यो जित ऐतिहासिक बनेको छ ।

खेलको ९० औँ मिनेटमा अमदले गोल गर्दै टोलीलाई जित दिलाएका हुन् । विश्वकपको इतिहासमा सन् २००६ यता वैकल्पिक खेलाडीको रूपमा मैदान प्रवेश गरेर खेलको यति ढिलो समयमा विजयी गोल गर्ने अमद पहिलो खेलाडी बनेका छन् ।

खेलको अन्तिम समयमा इक्वेडरले बराबरी गर्ने प्रयास गरे पनि आइभोरी कोस्टको डिफेन्सले बल क्लियर गरेलगत्तै रेफ्रीले खेल सकिएको सिट्टी बजाएका थिए ।