काठमाडौं– चालु आर्थिक वर्षमा स्वास्थ्य तथा जनसङ्ख्या मन्त्रालय र मातहतका निकायहरूको बजेट खर्च अपेक्षाअनुसार हुन नसकेको देखिएको छ । 

महालेखा परीक्षकको कार्यालयको वार्षिक प्रतिवेदनअनुसार विशेषगरी पुँजीगततर्फको खर्च कमजोर देखिएको हो । प्रतिवेदनअनुसार मन्त्रालय र मातहत निकायका लागि कुल ४९ अर्ब ८० करोड ५४ लाख रुपैयाँ प्रारम्भिक बजेट विनियोजन गरिएको थियो । 

पछि संशोधनपछि खुद बजेट ५० अर्ब ४९ करोड ४१ लाख रुपैयाँ पुगेको थियो । यसमध्ये ३६ अर्ब ८४ करोड ५९ लाख रुपैयाँ मात्रै खर्च भएको छ, जुन कुल बजेटको ७२ दशमलव ९७ प्रतिशत हो ।

चालुतर्फ ३९ अर्ब ५ करोड ६२ लाख रुपैयाँ प्रारम्भिक बजेट रहेकामा खुद बजेट ३५ अर्ब ७ करोड १२ लाख रुपैयाँ कायम भएको थियो। यसमध्ये २६ अर्ब ९९ करोड १२ लाख रुपैयाँ खर्च भएको छ, जुन ७६ दशमलव ९६ प्रतिशत हो ।

यस्तै, पुँजीगततर्फ प्रारम्भिक बजेट १० अर्ब ७४ करोड ९२ लाख रुपैयाँ रहेकामा संशोधनपछि १५ अर्ब ४२ करोड २९ लाख रुपैयाँ पुगेको थियो। तर खर्च भने ९ अर्ब ८५ करोड ४७ लाख रुपैयाँ मात्रै भएको छ, जुन ६३ दशमलव ९० प्रतिशत हो ।

महालेखा परीक्षकको कार्यालयले कुल बजेट खर्च सन्तोषजनक देखिए पनि पुँजीगततर्फको न्यून खर्चले स्वास्थ्य पूर्वाधार निर्माण, उपकरण खरिद तथा दीर्घकालीन योजनाको कार्यान्वयन प्रभावित हुन सक्ने संकेत गरेको छ ।