काठमाडौं– सरकारले द्वन्द्वकालमा बेपत्ता पारिएका व्यक्तिको छानबिन, सत्य निरुपण तथा मेलमिलाप प्रक्रियालाई अघि बढाउन स्विजरल्यान्ड सरकारबाट अनुदान सहायता स्वीकार गर्ने निर्णय गरेको छ।

बुधबार बसेको मन्त्रिपरिषद्को बैठकले ‘सत्य निरुपण मेलमिलाप कोष’का लागि स्वीस फ्रेन्क एक मिलियन बराबरको अनुदान सहयोग प्राप्त गर्ने निर्णय गरेको हो । 

बुधबार मन्त्रिपरिषद् बैठकपछि सञ्चारकर्मीसँग कुराकानी गर्दै मन्त्री सस्मित पोखरेलले यस्तो जानकारी दिएका हुन् ।

उक्त रकम द्वन्द्वकालीन घटनाको छानबिन, सत्य तथ्य उजागर तथा पीडितकेन्द्रित मेलमिलाप प्रक्रियालाई सुदृढ बनाउन उपयोग गरिने जनाइएको छ।

द्वन्द्वकालमा बेपत्ता पारिएका व्यक्तिको छानबिन, सत्य निरुपण र मेलमिलाप प्रक्रियालाई अगाडि बढाउन यो अनुदान महत्वपूर्ण सहयोग पुग्ने सरकारले विश्वास लिएको छ ।