काठमाडौं– बुटवलमा स्थानीय सीप, कला र उत्पादन प्रदर्शनी–२०८३ आयोजना गरिने भएको छ ।
स्थानीय शिल्पकला तथा सम्पदा प्रतिष्ठान नेपालले बुधबार बुटलमा पत्रकार सम्मेलन गर्दै स्थानीय सीप, कला तथा उत्पादनको संरक्षण, प्रवर्द्धन र बजारीकरण गर्ने उद्देश्यले वैशाख ५ गते स्थानीय सीप, कला र उत्पादन प्रदर्शनी गर्न लागिएको जनाएको हो ।
प्रतिष्ठानले जनउत्थान सामुदायिक लघुवित्त वित्तीय संस्था लिमिटेड, स्थानीय शिल्पकला तथा सम्पदा प्रतिष्ठान नेपाल र खस्यौली बजारको सहकार्यमा रुपन्देही जिल्लाको बुटवल उपमहानगरपालिका–६, ट्राफिक चोकको पुरानो फिल्महल परिसरमा आयोजना गर्न लागिएको जानकारी दिएको छ ।
स्थानीय शिल्पकला तथा सम्पदा प्रतिष्ठान नेपालका अध्यक्ष डा. मानबहादुर विकले यस प्रकारको प्रदर्शनी नेपालमै नयाँ र पहिलो प्रयास भएको बताए ।
उनले परम्परागत रैथाने उत्पादनले देशको अर्थतन्त्रमा योगदान पुर्याउने भएकाले यसको संरक्षण र बजार विस्तारमा विशेष ध्यान दिनुपर्नेमा जोड दिए ।
प्रदर्शनीमा स्थानीय सीपसम्बन्धी प्रत्यक्ष प्रदर्शन, हस्तकला तथा स्थानीय उत्पादन जातीय पहिचानका उत्पादन तथा कला सांस्कृतिक पहिचानका करिब ५० वटा स्टल, मौलिक खाना परिकार, झाँकी तथा सांस्कृतिक प्रस्तुति रहने बताइएको छ ।
प्रतिक्रिया