काठमाडौं – राष्ट्रिय स्वतन्त्र पार्टी (रास्वपा)ले आफ्ना नवनिर्वाचित प्रतिनिधिसभा सदस्यहरूका लागि अभिमुखीकरण प्रशिक्षण सञ्चालन गर्ने भएको छ। पार्टीका महासचिव कविन्द्र बुर्लाकोटीले जारी गरेको सूचनाअनुसार प्रशिक्षण आगामी चैत ३ र ४ गते काठमाडौँमा आयोजना गरिनेछ ।

सूचनाअनुसार नवनिर्वाचित सांसदहरूलाई प्रशिक्षणका लागि तयारी अवस्थामा रहन अनुरोध गरिएको छ। प्रशिक्षण कार्यक्रम दुवै दिन बिहान १० बजेदेखि सुरु हुने जनाइएको छ।

त्यसैगरी सबै सांसदहरूलाई चैत ३ गते बिहान ९ बजेभित्र काठमाडौँ उपत्यकाभित्र तोकिएको स्थानमा उपस्थित हुन पार्टीले आग्रह गरेको छ।

रास्वपाले संसद्‌मा प्रभावकारी भूमिका निर्वाह गर्न र संसदीय कामकारबाहीबारे जानकारी गराउन अभिमुखीकरण कार्यक्रम आयोजना गर्न लागेको जनाएको छ।