काठमाडौं – नायक विजय बराल र नायिका सनिशा भट्टराईले फिल्म ‘जिरो डिग्री’को सुटिङ सुरू गरेका छन् ।

पोखराको अर्मलाकोट मन्दिरामा शुभ मुहूर्त गरेसँगै उनीहरूले आइतबारबाट फिल्मको छायाङ्कन सुरु गरेका हुन् । नायक विजयले फिल्मको पहिलो सट दिए ।

डार्क कमेडी जनरामा बन्ने यस फिल्मको निर्देशन-स्क्रिप्ट लेखन आकास बराल र साजन काफ्ले संयुक्त रुपमा गरेका छन् । फिल्मको कथा राजन भुसालले लेखेका हुन् ।

आमाबुवाको निधन भएपछि विदेशमा रहेका सन्तान नफर्किउन्जेल शवलाई सुरक्षित राख्न ‘डीप फ्रिज’ बोकेर सडक सञ्जाल नपुगेको एक विकट गाउँमा लैजाँदा आइपर्ने उथलपुथल र रमाइला परिस्थितिहरूको कथामा यो फिल्म बन्ने निर्माण पक्षले बताएको छ ।

फिल्ममा विजय र सनिशासँगै वसुन्धरा भुसाल, रमेश बुढाथोकी, प्रकाश घिमिरे, लोकेन्द्र लेखक, राजन भुसाल, सन्जोग रसाइली, प्रवेश महतरा क्षेत्री, शारदा सिलवाल, सबिना थापा क्षेत्री, राम बाबु रेग्मी, सुवास गजुरेल र बासु खनाल लगायतका कलाकारहरूको अभिनय रहेको छ ।