काठमाडौं– राष्ट्रिय स्वतन्त्र पार्टीका वरिष्ठ नेता बालेन्द्र शाह पार्टीको समानुपातिकको नाम छनोट गर्न बसेको बैठकमा सहभागी भएनन् ।

उनी औपचारिक बैठकमा भर्चुअल र भौतिक दुवै विधिबाट सहभागी नभएका हुन् । बालेन्द्र र राष्ट्रिय स्वतन्त्र पार्टीको एकतापछि अहिलेसम्म कुनै औपचारिक बैठकमा बालेन्द्र सहभागी भएका छैनन् । नयाँ सदस्यहरूका लागि विधान संशोधन गरेरमात्रै सहभागी गराउने पार्टीको तालिका छ । 

पार्टीको तर्फबाट आगामी प्रधानमन्त्रीको दावेदार रहेका बालेन्द्रलाई अब बस्ने केन्द्रीय कमिटी बैठक र सचिवालयले विधान संशोधन गरेर संसदीय दलको नेता बनाउनेछ । त्यसपछि मात्रै हुने पार्टीको औपचारिक बैठकमा सहभागी हुने जानकारी पार्टी नेताहरूले गराए ।

‘वरिष्ठ नेताज्यू बैठकमा सहभागी हुनुहुन्न, उहाँले आफ्नो तर्फबाट गर्नुपर्ने काम गरिसक्नुभएको छ’, पार्टीका एक शीर्ष नेताले भने,’ सभापतिज्यूसँग समन्वय गरेरै भर्चुअल र भौतिक दुवै रुपमा सहभागी नहुने हामीलाई जानकारी छ । सभापतिज्यू स्वास्थ्यमा समस्या भएका कारण भर्चुअल्ली जोडिनु हुन्छ।’