काठमाडौँ – विशेष महाधिवेशनपछि कांग्रेस विवादको विषयमा परेको रिटको सुनुवाइ आज सर्वोच्च अदालतमा हुँदैछ । विशेष महाधिवेशनबाट निर्वाचित नेपाली कांग्रेसका सभापति गगन थापा पक्षलाई आधिकारिकता दिने निर्वाचन आयोगको निर्णय विरुद्ध निवर्तमान सभापति शेरबहादुर देउवा समूहले सर्वोच्चमा दायर गरेको रिटको सुनुवाइको पेसी आजलाई तोकिएको हो ।

आइतबार सार्वजनिक पेसी सूची अनुसार सर्वोच्च अदालतका न्यायाधीशद्वय विनोद शर्मा र मेघराज पोखरेलको संयुक्त इजलासमा सुनुवाइ हुन लागेको हो । उक्त मुद्दाको पेसी क्रम सङ्ख्या २२ मा छ ।

गत पुस अन्तिममा गगन थापा र विश्वप्रकाश शर्मा समूहले विशेष महाधिवेशन आह्वान गरेर नयाँ कार्यसमिति चयन गरेपछि कांग्रेसमा आधिकारिकताको विवाद चुलिएको थियो ।

आयोगको निर्णयविरुद्ध तत्कालीन कार्यवाहक सभापति पूर्णबहादुर खड्काले अदालतमा रिट दर्ता गराएका हुन् । रिटमा विशेष महाधिवेशनको नेतृत्वलाई आधिकारिकता दिने निर्वाचन आयोगको निर्णय बदर गर्न माग गरिएको छ ।