काठमाडौं- भारत र श्रीलंकामा जारी आईसीसी टी–२० विश्वकपमा अमेरिकाले लगातार दोस्रो जित हासिल गरेको छ । आइतबार भारतको चेन्नईस्थित चिदमबरम रंगशालामा भएको खेलमा नाबियालाई अमेरिकाले ३१ रनले पराजित गरेको हो ।

समूह ए अन्तर्गतको खेलमा अमेरिकाले दिएको २ सय रनको लक्ष्य पछ्याउँदै जवाफी ब्याटिङ गरेको नामिबिया निर्धारित २० ओभरमा ६ विकेट गुमाउँदै १६८ रनमै सीमित भयो ।

नामिबियाका लागि लरेन स्टिनक्याम्पले ५८ रन बनाए भने जेजे स्मिटले ३१ रन बनाए । अमेरिकाका शेड्ली भान साल्कविकले सर्वाधिक २ विकेट लिए ।

त्यसअघि टस जितेर पहिले ब्याटिङ गरेको अमेरिकाले निर्धारित २० ओभरमा ४ विकेट गुमाएर १९९ रन बनाएको थियो । अमेरिकाका लागि सञ्जय कृष्णमूर्तिले सर्वाधिक ६८ रन जोडे । कप्तान मोनाङ्क पटेलले ५२ रन बनाए ।

यस हारसँगै नामिबिया टी–२० विश्वकप २०२६ बाट बाहिरिएको छ । नामिबियाले यस प्रतियोगिताका तीन वटै खेलमा पराजय बेहोरेको छ ।