काठमाडौं– आईसीसी विश्वकप अन्तर्गत आइतबारको खेलमा वेस्ट इन्डिजसँग नेपालले फराकिलो हार व्यहोरेको छ । वेस्ट इन्डिजले ९ विकेटले जितेको हो ।

मुम्बईको वानखेडे रंगशालामा टस जितेर वेस्ट इन्डिजले पहिले फिल्डिङ गरेको थियो । पहिले ब्याटिङ गरेको नेपालले प्रस्तुत गरेको १३४ रनको लक्ष्य वेस्ट इन्डिजले १५ ओभरमा २ बलमा १ विकेटको क्षतिमा भेट्टायो ।

आजको खेलमा ब्याटिङ र बलिङ दुवैमा नेपाल कमजोर देखियो । बलिङतर्फ नेपालका नन्दन यादवले ओपनर ब्रान्डन किङको एक विकेट लिए । अन्य बलर विकेटविहीन रहे ।

वेस्ट इन्डिजका किङले १७ बलमा ४ चौकाको सहयोगमा २२ रन जोडे । ओपनर शाई होपले अर्धशतक प्रहार गरे । उनले ४४ बलमा ५ चौका र ३ छक्काको सहयोगमा ६१ रन जोडे ।

शिमरोन हिटमायरले अविजीत ४६ रन जोडे । उनले ३२ बलमा ४ चौका र २ छक्का प्रहार गरे ।

पहिलो इनिङमा नेपालका दीपेन्द्रसिंह ऐरीले अर्धशतक प्रहार गरे । उनले ५८ रन जोडे । सुरुवाती क्रममा अन्य ब्याटरहरु चल्न नसक्दा नेपालको इनिङ नाजुक बनेको थियो ।

ओपनर कुशल भुर्तेल १, अर्का ओपनर आशिफ शेख ११, कप्तान रोहित पौडेल ५, आरिफ शेख २, लोकेश बम १३, गुल्शन झा ११ रनमा आउट भए । सोमपाल कामीले अविजीत २६ रन जोडे । सोमापल र दीपेन्द्रको ब्याटिङले नेपाललको इनिङ केही हदसम्म उकासिएको थियो ।