काठमाडौं– विगतका वर्षमा जस्तै चालु आर्थिक वर्ष (आव) मा पनि सरकारको पुँजीगत खर्चमा सुधार हुन नसकेको देखिएको छ । महालेखा नियन्त्रक कार्यालयका अनुसार चालु आवको अर्धवार्षिक अवधिमा सरकारको पुँजीगत खर्च कुल लक्ष्यको तुलनामा गत आवको भन्दा पनि कमजोर बनेर १२.१२ प्रतिशतमा सीमित हुन पुगेको छ ।

जबकी गत आवको अर्धवार्षिक अवधिमा सरकारले १६.१६ प्रतिशत पुँजीगत खर्च गरेको थियो ।

चालु आवमा सरकारले ४ खर्ब ७ अर्ब ८८ करोड ८० लाख रुपैयाँ पुँजीगत खर्च गर्ने लक्ष्य तय गरेको थियो । जसमा समीक्षा अवधिसम्म ४९ अर्ब ४२ करोड ५४ लाख रुपैयाँ मात्रै खर्च भएको छ ।

तर, समीक्षा अवधिमा सरकारको चालु खर्च भने ४ खर्ब ८७ अर्ब १४ करोड ३१ लाख रुपैयाँ अर्थात् कुल वार्षिक लक्ष्यको ४१.२५ प्रतिशत भएको छ । साथै, सो अवधिमा वित्तीय व्यवस्था तर्फको खर्च १ खर्ब ५३ अर्ब ६४ करोड ६९ लाख रुपैयाँ भएको कार्यालयले जनाएको छ ।

गत आवको अर्धवार्षिक अवधिमा सरकारले कुल लक्ष्यको ३५.८९ प्रतिशत खर्च गरेको थियो ।

सरकारले खर्च जस्तै आफ्नो आम्दानीमा पनि सुधार गर्न नसकेको देखिएको छ । गत आवको अर्धवार्षिक अवधिमा सरकारले तोकिएको लक्ष्यमा ३९.६ प्रतिशत आम्दानी गरेकोमा चालु आवमा भने तोकिएको लक्ष्यमा ३८.३८ प्रतिशत मात्रै गरेको कार्यालयले जनाएको छ ।

सरकारले चालु आवमा १५ खर्ब ३३ अर्ब ४४ करोड ६९ लाख रुपैयाँ आम्दानीको लक्ष्य राखेकोमा समीक्षा अवधिसम्म जम्मा ५ खर्ब ८८ अर्ब ५१ करोड ४२ लाख रुपैयाँ मात्रै आम्दानी गरेको छ ।