वासिङ्टन- अर्जेन्टिनाका राष्ट्रपति जेभियर मिलेईले आगामी नोभेम्बरमा हुने अमेरिकी मध्यावधि चुनावबाट राष्ट्रपति डोनाल्ड ट्रम्प थप बलियो बनेर उदाउने आशा व्यक्त गरेका छन् ।

ट्रम्पको चुनावी सफलता अमेरिका मात्र नभई समग्र पश्चिमी जगत्का लागि महत्त्वपूर्ण हुने मिलेईको भनाइ छ ।

बुधबार आयोजित ‘हिस्पानिक हेरिटेज गाला’मा सम्बोधन गर्दै उनले आफ्नो पक्षले पश्चिमी गोलार्धमा पुनः विजय हासिल गर्ने अवसर गुमाउन नहुने बताए ।

‘जित्नु पहिलो चरण मात्र हो । अब हामीसँग अमेरिकालाई फेरि महान् बनाउने जनादेश छ,’ उनले भने ।

मिलेई बुधबार अमेरिकी राजधानी वासिङ्टन पुगेका हुन् । उनले त्यहाँ लगानीकर्ताहरूसँग भेटघाट गरेका छन् भने बिहीबार अमेरिकी वाणिज्य सङ्घमा सम्बोधन गर्ने कार्यक्रम छ ।

ल्याटिन अमेरिकामा मिलेई ट्रम्पका निकट सहयोगीमध्ये एक मानिन्छन् । एक वर्षअघि अर्जेन्टिनामा भएको महत्त्वपूर्ण विधायी निर्वाचनका क्रममा ट्रम्पले मिलेईलाई दृढ समर्थन गरेका थिए ।

ट्रम्पको समर्थन र अमेरिकी अर्थ मन्त्रालयसँग भएको मुद्रा विनिमय सम्झौताले उक्त निर्वाचनमा मिलेईको सफलतामा योगदान पुर्‍याएको थियो ।

पछिल्ला वर्षमा ल्याटिन अमेरिका र क्यारिबियन क्षेत्रमा दक्षिणपन्थी राजनीतिक धार बलियो बन्दै गएको छ । ट्रम्प दोस्रो पटक अमेरिकी राष्ट्रपति बनेपछि यस प्रवृत्तिले थप गति लिएको छ ।