काठमाडौँ – रानीपोखरीमा बुधबार राति एक पुरुष मृत अवस्थामा फेला परेका छन्।

काठमाडौँ महानगरपालिका–२८ स्थित रानीपोखरीभित्र अन्दाजी ३५ देखि ४० वर्षका पुरुषको शव पानीमा तैरिरहेको अवस्थामा फेला परेको हो।

स्थानीयले रानीपोखरीमा शव तैरिरहेको सूचना दिएलगत्तै नेपाल प्रहरी विपद् प्रतिकार्य तथा तालिम केन्द्रबाट प्रहरी निरीक्षकको कमान्डमा २५ जनाको विपद् उद्धार टोली घटनास्थल पुगेको थियो। टोलीले आवश्यक उद्धार सामग्रीको प्रयोग गरी शवलाई बाहिर निकालेको हो।

मृतकको पहिचान अझै खुल्न सकेको छैन। उद्धारपश्चात् आवश्यक कानुनी प्रक्रिया पूरा गरी शव पोस्टमार्टमका लागि महाराजगन्जस्थित त्रिवि शिक्षण अस्पताल (टिचिङ) पठाइएको प्रहरीले जनाएको छ।

घटनाबारे थप अनुसन्धान भइरहेको छ।