काठमाडौँ – बागमती, गण्डकी र कर्णाली प्रदेशअन्तर्गतका विभिन्न मुख्य राजमार्ग तथा सडक खण्डहरू प्रभावित भएका छन्।

नेपाल प्रहरीले मङ्गलबार बिहान सार्वजनिक गरेको तथ्याङ्क अनुसार केही स्थानमा सडक पूर्ण रूपमा अवरुद्ध छ भने केही स्थानमा एकतर्फी मात्र सवारी साधन सञ्चालन भइरहेका छन्।

प्रहरीका अनुसार बिपी राजमार्गअन्तर्गत काभ्रेको खुर्कोट–नेपालथोक–कटुञ्जेबेँसी खण्डमा १० टनसम्मका मालबाहक सवारी साधनलाई साँझ ७ देखि बिहान ५ बजेसम्म सञ्चालनमा रोक लगाइएको छ। सो खण्डमा बिहान ४ देखि साँझ ६ बजेसम्म परिस्थितिको मूल्याङ्कन गरी मात्र सवारी सुचारु गर्ने व्यवस्था मिलाइएको छ। यस्तै, रसुवाका सम्पूर्ण मुख्य राजमार्गहरू बाढीका कारण पूर्ण रूपमा ठप्प रहेका छन्।

नुवाकोटको टोखा–छहरे सडक खण्डको शिवपुरी–८ स्थित घट्टेखोलामा जोखिमका कारण राति १० देखि बिहान ५ बजेसम्म सवारी सञ्चालनमा रोक लगाइएको छ भने पसाङ ल्हामु सडक खण्डअन्तर्गत विदुर–१० सिमटारमा बाढीका कारण सडक पूर्ण रूपमा अवरुद्ध भएको छ।

यसैगरी पृथ्वीलोकमार्गअन्तर्गत धादिङको बेनिघाट रोराङ–७ स्थित कृष्णभिरमा पहिरो जाँदा सडक पूर्ण रूपमा बन्द छ। सोही गाउँपालिकाको ज्वालाखोला र शीतलबजार क्षेत्रमा भने पहिरो हटाई सडक एकतर्फी सुचारु गरिएको छ। नारायणगढ–मुग्लिन सडक खण्डअन्तर्गत चितवनको तुइनखोलामा सडक मर्मत भइरहेकाले गाडीको चाप हेरेर एकतर्फी आवागमन गराइएको छ।

उता गण्डकी प्रदेशको मनाङस्थित चामे–बेसीसहर सडक खण्डको नासो–३ धारापानीमा बाटो निर्माणका कारण हाल साना सवारी साधन मात्र सञ्चालनमा ल्याइएको छ। कर्णाली प्रदेशअन्तर्गत हुम्लाको कर्णाली करिडोर (सर्केगाड–६, खरीखेत) मा पहिरो जाँदा सडक पूर्ण रूपमा अवरुद्ध बनेको छ। नेपाल प्रहरीले नागरिकलाई सडकको अद्यावधिक स्थिति बुझेर मात्र यात्रा तय गर्न आग्रह गरेको छ।