तेहरान– इरानका विदेशमन्त्री सैयद अब्बास अराघचीले अमेरिकासँग वार्ता पुनः सुरु गर्ने विषयमा इरानले अहिलेसम्म कुनै निर्णय नगरेको बताएका छन्।

सरकारी समाचार संस्था आइआरआइबीसँग शनिबारको अन्तर्वार्तामा अराघचीले कतार र पाकिस्तानजस्ता मध्यस्थकर्तामार्फत इरान र अमेरिकाबीच सन्देश आदानप्रदान भइरहेको जानकारी दिए। यद्यपि, यस्तो सन्देश आदानप्रदानलाई दुई देशबीच वार्ता पुनः सुरु भएको अर्थमा लिन नहुने उनले स्पष्ट पारे।

गत जुनमा इरान र अमेरिकाबीच युद्ध अन्त्य गर्ने समझदारी भएको स्मरण गर्दै अराघचीले अमेरिकाले उक्त समझदारी उल्लङ्घन गरेपछि पुनः द्वन्द्व सुरु भएको आरोप लगाए।

यसैबीच, स्ट्रेट अफ होर्मुज हुँदै पानीजहाजको सुरक्षित आवतजावतका लागि इरान र ओमानबीच नयाँ मार्ग निर्धारण गर्ने विषयमा वार्ता भइरहेको उहाँले बताए। उनका अनुसार हाल अस्थायी मार्गको खाका तयार पार्ने काम भइरहेको छ, जसलाई आगामी चरणमा स्थायी मार्गमा परिणत गरिनेछ।

होर्मुजमार्फत आवतजावत पूर्ण रूपमा सञ्चालनमा आउने विषय अन्य सर्तहरूको पालनामा निर्भर रहेको उल्लेख गर्दै अराघचीले त्यसका लागि अमेरिका ती सर्तप्रति प्रतिबद्ध हुनुपर्ने बताए। उनले यस विषयमा चाँडै निष्कर्षमा पुग्न सकिने आशासमेत व्यक्त गरे।

गत जुन १८ मा इरान र अमेरिकाले लेबनानसहित यस क्षेत्रका सबै मोर्चामा युद्ध अन्त्य गर्ने समझदारीपत्रमा हस्ताक्षर गरेका थिए। उक्त समझदारीअनुसार अन्तिम सम्झौताका लागि दुई देशबीच ६० दिनभित्र वार्ता हुनुपर्ने थियो।

तर, गत महिना दुई देशबीच पुनः तनाव बढेपछि प्रस्तावित वार्ताको भविष्य अनिश्चित बनेको छ। समझदारीअनुसार तोकिएको ६० दिने समयसीमा आगामी सोमबार सकिँदैछ।