ब्रसेल्स – युरोपियन युनियन (ईयू) ले युक्रेनसहित सदस्यता लिन इच्छुक राष्ट्रहरूसँग दोस्रो चरणको सदस्यता वार्ता सुरु गरेको छ। युक्रेनले सदस्यता प्रक्रियालाई तीव्र बनाउन ईयूमाथि दबाब दिइरहेका बेला मङ्गलबार ब्रसेल्समा नयाँ चरणको वार्ता अघि बढाइएको हो।

हंगेरीको विरोधका कारण सदस्यता प्रक्रिया केही समय अवरुद्ध भएपछि ईयूले गत महिना युक्रेनसँग पहिलो चरणको औपचारिक वार्ता सुरु गरेको थियो। अहिले दोस्रो चरणअन्तर्गत सुरक्षा, रक्षा, विदेश नीति तथा अन्य महत्त्वपूर्ण विषयमा छलफल भइरहेको छ।

ईयूको सदस्य बन्न इच्छुक राष्ट्रहरूले वातावरण, कृषि, न्याय प्रणाली, शासन व्यवस्था तथा अन्य क्षेत्रलाई ईयूका कानुन र मापदण्डअनुसार रूपान्तरण गर्नुपर्ने हुन्छ। यसका लागि वार्तालाई विभिन्न विषयगत छ समूहमा विभाजन गरिएको छ।

मङ्गलबार ईयूका मन्त्रीहरूले आफ्ना युक्रेनी समकक्षीसँग सुरक्षा, रक्षा र विदेश नीतिसम्बन्धी विषयमा छलफल गरेका छन्। तर युक्रेन र ब्रसेल्समा सुरु हुन लागेको गर्मीयामको बिदाका कारण सबै समूहको वार्ता निकट भविष्यमै निष्कर्षमा पुग्ने सम्भावना कम रहेको अधिकारीहरूले बताएका छन्।

रूसले सन् २०२२ मा युक्रेनमाथि पूर्ण आक्रमण सुरु गरेपछि युक्रेनले ईयू सदस्यताका लागि आवेदन दिएको थियो। यद्यपि पूर्ण सदस्यता प्राप्त गर्न उसले अझै लामो र जटिल प्रक्रिया पूरा गर्नुपर्नेछ।

युक्रेन मात्र होइन, मोल्डोभा पनि सदस्यता प्रक्रियाको दोस्रो चरणमा सक्रिय रूपमा सहभागी भएको छ। त्यस्तै, आगामी महिना प्रमुख उम्मेदवारको रूपमा हेरिएको मोन्टेनेग्रोले पनि अल्बानियासँगै थप वार्ताका विषयमा प्रगति गरिरहेको जनाइएको छ।

युरोपियन युनियनका विस्तारसम्बन्धी आयुक्त मार्टा कोसले मङ्गलबारलाई ईयू विस्तार प्रक्रियाका लागि ‘सुपर मङ्गलबार’ को संज्ञा दिँदै वार्तालाई छिटो निष्कर्षमा पुर्‍याउनुपर्ने आवश्यकता औंल्याएकी छन्।