काठमाडौं– विपक्षी दलका सांसदहरूले राज्य संरक्षित व्यक्तिहरूले विभिन्न सञ्चारमाध्यम लगायतका स्थानमा सवारी साधन राखेर त्रास सिर्जना गर्न खोजेको भन्दै कारबाहीको माग गरेका छन् ।  

मंगलबार प्रतिनिधिसभा बैठकमा उनीहरूले सवारी साधन राखेर त्रास सिर्जना गर्न खोज्नेहरूलाई सामान्य ट्राफिक जरिवाना मात्रै गरिएकोप्रति आपत्ति समेत जनाएका छन् ।

बैठकमा कांग्रेस सचेतक निष्कल राईले सरकारमाथि प्रश्न गर्नेमाथि राज्य संयन्त्रले दमन गर्न खोजेको आरोप लगाए । 

उनले होल्डिङ सेन्टर, गणेश नेपालीको घटना र गाडी तेर्स्याउने प्रकरणमा राज्यको संलग्नता रहेको उल्लेख गरे । उनले सरकारले हरेक प्रकरणलाई राजनीतिकरण गर्न खोजेको बताए । 

त्यस्तै नेकपाका सांसद रमेश मल्लले सञ्चारमाध्यम अगाडी सवारी साधन राखेर त्रास फैलाउनेलाई कडा कारबाही गर्न माग गरे । 

उनले राज्य संरक्षित केही व्यक्तिबाट उक्त गतिविधि भएको आरोप लगाउँदै सामान्य जरिवाना तिराएर जिम्मेवारीबाट उन्मुक्ति दिने काम स्वीकार्य नहुने स्पष्ट पारे । ।

विपक्षी दलका सांसदहरूले सवारी साधन पार्किङ घटनामा राज्यको संलग्नता भएको आरोप लगाएपछि रास्वपाका केहि सांसदहरूले नियमापत्ति गरेका थिए ।