काठमाडौं- शिक्षा तथा खेलकुदमन्त्री सस्मित पोखरेलले काठमाडौं महानगरपालिकामा हुँदा आफूहरूले यमबुद्ध पार्क सोचे जस्तो बनाएको बताएका छन् ।

यसले स्केटिङ तथा स्केटबोर्डिङ खेललाई उचाइमा पुर्‍याउन मद्दत पुग्ने पनि उनले बताएका छन् ।

नेपाल स्केटिङ तथा स्केटबोर्डिङ संघको आयोजनामा भएको नवौँ राष्ट्रिय स्केटबोर्ड प्रतियोगिताको आइतबार उद्घाटन गर्दै उनले खुला सार्वजनिक जग्गामा यस्ता स्केटबोर्ड मैदान बनाएर खेलको विकास गर्ने अभियानमा सरकार रहेको जानकारी दिए ।

काठमाडौं महानगरपालिकाको-५ मा हाँडीगाउँ पहेँलो पुलनजिकै बनेको यमबुद्ध पार्क निर्माणले आफू उत्साहित भएको उल्लेख गर्दै मन्त्री पोखरेलले यसको सदुपयोग गर्न पनि स्थानीयलाई आग्रह गरे।

यस प्रतियोगितामा देशभरबाट १५० पुरुष र १०० महिला खेलाडी सहभागी छन् । दुई दिने प्रतियोगितामा पहिलो दिन शनिबार छनोट चरणका खेल भए। आइतबार दोस्रो दिन उत्कृष्ट खेलाडीबीच प्रतिस्पर्धा भइरहेको छ ।

प्रतियोगितामा स्केटबोर्डिङको ‘फ्री स्टाइल’ विधामा प्रतिस्पर्धा भइरहेको छ । आयोजकका अनुसार उत्कृष्ट प्रदर्शन गर्ने खेलाडीलाई ‘बेस्ट ट्रिक’ र ‘बेस्ट रन’ पुरस्कार प्रदान गरिनेछ ।

प्रतियोगिताबाट ‘स्केटबोर्डर अफ द इयर’ समेत घोषणा गरिने आयोजकले जनाएको छ ।

पुरुष तथा महिला सिनियरतर्फ प्रथम, द्वितीय र तृतीय हुने खेलाडीले क्रमशः ३० हजार, २० हजार र १५ हजार रुपियाँ नगदसहित मेडल तथा प्रमाणपत्र प्राप्त गर्नेछन् ।

यस्तै जुनियर पुरुष तथा महिला समूहमा प्रथम, द्वितीय र तृतीय हुनेले क्रमशः १५ हजार, १० हजार र पाँच हजार रुपियाँ नगद पुरस्कार पाउने संघका अध्यक्ष अच्युत खनालले बताए ।

राष्ट्रिय स्केटबोर्ड प्रतियोगिता यसअघि विराटनगर, बुटवल, पोखरा र काठमाडौंमा आयोजना भइसकेका छन् ।