काठमाडौं – नुवाकोटमा दुईजना दाजुभाइको हत्या प्रकरणमा प्रहरीले ६ जनालाई पक्राउ गरेको छ। म्यागङ गाउँपालिका–४ किम्ताङका ४३ वर्षीय समराज तामाङ र उनका भाइ ३६ वर्षीय सूर्यमान तामाङको हत्या आरोपमा उनीहरूलाई पक्राउ गरिएको जिल्ला प्रहरी कार्यालय नुवाकोटले जनाएको छ।

प्रहरीका अनुसार स्थानीय धनबहादुर तामाङ उर्फ धने र सोमबहादुर तामाङ उर्फ माइलासहित ६ जनालाई नियन्त्रणमा लिइएको हो।

चार जनालाई बुधबार नै नियन्त्रणमा लिइएको थियो भने घटनाका मुख्य अभियुक्त मानिएका धने र माइलालाई बिहीबार बिहान धादिङको खनियाँबास गाउँपालिका–५ भीरवनबाट पक्राउ गरिएको प्रहरीले जनाएको छ।

मंगलबार बिहान कुलो बनाउन भन्दै घरबाट निस्केका समराज र सूर्यमानको शव बुधबार बिहान किम्ताङ खोलामा ढुङ्गाले छोपेर लुकाइएको अवस्थामा फेला परेको थियो। दुवै शव पोस्टमार्टमका लागि त्रिशूली अस्पताल पठाइएको प्रहरीले जनाएको छ।

प्रारम्भिक अनुसन्धानका क्रममा पुरानो रिसइबीका कारण भरुवा बन्दुक प्रहार गरी दाजुभाइको हत्या गरिएको खुलेको प्रहरीको भनाइ छ।

घटनास्थलबाट प्रहरीले खुकुरी, तीनवटा भरुवा बन्दुक र एउटा मोटरसाइकल समेत बरामद गरेको छ।