काठमाडौं -सामाजिक सुरक्षा कोष र काठमाडौं इन्स्टिच्युट अफ चाइल्ड हेल्थबीच स्वास्थ्य सेवा प्रवाहसम्बन्धी सम्झौता भएको छ।

सामाजिक सुरक्षा कोषमा आबद्ध योगदानकर्ता तथा उनीहरूका परिवारलाई सहज र गुणस्तरीय स्वास्थ्य सेवा उपलब्ध गराउने उद्देश्यले बिहीबार उक्त सम्झौता गरिएको हो।

सम्झौतापत्रमा कोषका कार्यकारी निर्देशक प्रेम प्रसाद आचार्य र इन्स्टिच्युटका अध्यक्ष तथा वरिष्ठ चिकित्सक भगवान कोइराला ले हस्ताक्षर गरेका छन्।

सम्झौतापछि सामाजिक सुरक्षा कोषमा आबद्ध योगदानकर्ताले काठमाडौं इन्स्टिच्युट अफ चाइल्ड हेल्थमार्फत आफ्ना सन्ततिका लागि कोषअन्तर्गत उपलब्ध स्वास्थ्य सेवा सुविधा प्राप्त गर्न सक्नेछन् ।

सम्झौता कार्यक्रममा दुवै संस्थाका पदाधिकारीहरूले योगदानकर्तामैत्री स्वास्थ्य सेवा विस्तार, गुणस्तरीय उपचारमा पहुँच अभिवृद्धि तथा सेवाप्रवाहलाई थप प्रभावकारी बनाउने प्रतिबद्धता व्यक्त गरेका थिए।

सामाजिक सुरक्षा कोषले योगदानकर्तालाई देशभर सहज स्वास्थ्य सेवा पहुँच सुनिश्चित गर्न विभिन्न अस्पताल तथा स्वास्थ्य संस्थासँग सहकार्य विस्तार गर्दै आएको जनाएको छ।