गोरखा – मनकामना मन्दिर दर्शन गरेर फर्कँदै गरेका तीर्थयात्री चढेको विद्युतीय माइक्रोबस गोरखामा दुर्घटना हुँदा सात जनाको मृत्यु भएको छ।

शनिबार शहीदलखन गाउँपालिका–३ कान्टार क्षेत्रमा बागमती प्रदेश ००६ ख ८४३० नम्बरको माइक्रोबस सडकबाट करिब दुई सय मिटर तल खसेको प्रहरीले जनाएको छ। सवारीमा चालक र सहचालकसहित १४ जना सवार थिए।

प्रहरीका अनुसार दुर्घटनास्थलमै सात जनाको ज्यान गएको हो । ज्यान गुमाउने सबै भारतीय नागरिक रहेको बताइएको छ । घाइते भएका अन्य सात जनालाई भने तत्काल उद्धार गरी उपचारका लागि पठाइएको छ।

प्रारम्भिक जानकारी अनुसार चालक र सहचालक बाहेक माइक्रोबसमा सवार सबै भारतीय नागरिक थिए। उनीहरू मनकामना मन्दिर दर्शनका लागि गएका तीर्थयात्री रहेको प्रहरीले जनाएको छ।

दुर्घटनापछि प्रहरी र स्थानीय बासिन्दा घटनास्थलमा पुगेर उद्धार कार्यमा खटिएका थिए । भीरालो भूभागका कारण उद्धार कार्य केही समयसम्म चुनौतीपूर्ण बनेको बताइएको छ।