काठमाडौं – जेन-जी मुभमेन्ट नेपालले भाद्र २३ र २४ गते भएको आन्दोलनका घटनाबारे सरकारसँग प्रतिवेदन सार्वजनिक गर्न माग गरेको छ । 

शनिबार विज्ञप्तिमा जारी गर्दै मुभमेन्टले आन्दोलनमा भएका हत्या, आगजनी र हिंसात्मक घटनाको सत्य तथ्य बाहिर नल्याए न्याय र दायित्व स्थापित गर्न नसकिने उल्लेख गरेको छ । संगठनले पारदर्शीता र उत्तरदायित्व सुनिश्चित नगरी आन्दोलनको प्रतिवेदन सार्वजनिक नगर्ने अवस्था पूर्ण अस्वीकृत भएको बताएको छ ।

सत्य लुकाएर वा दोषीलाई संरक्षण गरेर कुनै पनि राजनीतिक प्रक्रिया अघि बढाउन खोज्नु जनभावना र लोकतान्त्रिक मूल्यविरुद्ध हुने मुभमेन्टको धारणा छ। मुभमेन्टले आइतबार माइतीघर मण्डलामा शान्तिपूर्ण प्रदर्शनका लागि उपस्थित हुन अपील गरेको छ ।