काठमाडौं- नेपाली कांग्रेसका कार्यवाहक सभापति पूर्णबहादुर खड्काले अब पार्टी फुट्ने निश्चित भएको बताएका छन् ।

कांग्रेस केन्द्रीय कार्यालय सानेपास्थित बैठक हलमा संस्थापन पक्षीय नेताहरूलाई बुधबार दिउँसो ब्रिफिङका क्रममा उनले अब पार्टी जोगाउन नसकिने बताएका हुन् ।

‘अब पार्टी फुटमा जाने करिब निश्चित भएको छ’, उनले ब्रिफिङबारे त्यहाँ उपस्थित एक नेताले भने, ‘महामन्त्रीहरूले आगामी निर्वाचनपछि प्रधानमन्त्री घोषणा, सभापति शेरबहादुर देउवाजीको राजनीतिबाट सन्यास र प्रतिनिधि सभाको टिकट वितरणका लागि हाईकमान्ड बनाउने कुरा छोडेनन्। अरू सबै माग पूरा हुने गरी सहमति भइसकेको थियो । तर यी तीन कुरामा सहमति हुन सकेन।’

त्यसैगरी सानेपामै देउवानिकट अर्का नेता रमेश लेखकले प्रतिनिधि सभाको टिकट कसले सही गर्ने भनेर बोलाउँदा पनि महामन्त्रीहरू तयार नभएको बताएका छन् ।

‘सभापतिजीले सांसका उम्मेदवारको टिकटमा सही पनि तपाईंहरू कसले गर्ने हो गरेर आउनु, म छोडन तयार छु भन्दा पनि महामन्त्रीहरू मानेनन्’, लेखकले सानेपा बैठकमा भने ।

उनले सबै कुरामा धेरै प्रयास गरे पनि, लचकता अपनाउँदा पनि समाधान हुन नसकेको सुनाएका छन् । ‘छलफलले सफलता पाउन सकेको छैन’, उनले भने, ‘सभापतिले हदैसम्म लचक हुँदा पनि कुरा मिल्न सकेन ।’