काठमाडौं – उज्यालो नेपाल पार्टीका अध्यक्ष तथा पूर्वमन्त्री कुलमान घिसिङले आफ्नो पार्टीले कुनै पनि राजनीतिक दलसँग एकता नगर्ने स्पष्ट पारेका छन्।

गत पुस १४ गते राष्ट्रिय स्वतन्त्र पार्टीसँगको एकता १२ दिनमै भंग भएपछि उनले बुधबार फेसबुकमार्फत यस्तो जानकारी दिएका हुन्।

कुलमानले फेसबुकमा लेखेका छन्, ‘विभिन्न सामाजिक सञ्जालमा म अध्यक्ष रहेको उज्यालो नेपाल पार्टी र मेरो नाम जोडेर अन्य पार्टी, विशेषगरी नेपाली कम्युनिस्ट पार्टीसँग एकीकरण हुन लागेको भन्ने हल्ला पूर्ण रूपमा भ्रामक र असत्य हो।’

उनले उज्यालो नेपाल पार्टी कुनै पनि पार्टीसँग एकीकरण नगरी आफ्नै नीति, सिद्धान्त र कार्यक्रमका आधारमा स्वतन्त्र रूपमा अगाडि बढिरहेको छ बताए ।

‘भविष्यमा पनि त्यसैगरी अघि बढ्नेछ। यस्ता निराधार र भ्रम फैलाउने समाचारमा विश्वास नगर्नुहुन सबैमा हार्दिक अनुरोध गर्दछु’, उनले भनेका छन्। यससँगै पार्टीले एकता नगरी आफ्नै मार्गमा अगाडि बढ्ने स्पष्ट संकेत गरेको छ।