काठमाडौं– नेपाली कांग्रेसका महामन्त्री गगनकुमार थापा र विश्वप्रकाश शर्माले सभापति शेरबहादुर देउवा मध्यमार्गी मोडलमासमेत सकारात्मक नभएको आफू समर्थक नेतालाई ब्रिफिङ गरेका छन्।

कांग्रेस सभापति देउवासँगको वार्ताबाट बाहिरिएपछि महामन्त्रीद्वयले उक्त ब्रिफिङ गरेको नेताहरूको दाबी छ ।

‘मध्यमार्गी मोडलमासमेत सभापति देउवा सकारात्मक नभएको अवस्था छ, साथीहरू अहिले हामी वार्ताबाट निस्केका छौँ । पुनः हामीले राखेको शर्तमा उहाँको मन्जुर हुन्छ भने वार्तामा बोलाउनु भनेका छौँ,’ महामन्त्रीद्वयको भनाइ उधृत गर्दै एक नेताले भने ।

वार्तामा सहभागी महामन्त्रीले समूहमा ब्रिफिङ गरेको जानकारी गराउँदै ती नेताले भने, ‘निर्वाचनको टिकटमा सभापति देउवाले हस्ताक्षर नगर्ने विषयमा सभापति नरम देखिनुभएको छ । अरु कुराहरू मिल्न बाँकी छ उहाँ राजीनामा दिन तयार हुनुहुन्न रे  ।’

हिजो दिउँसो र रातभर चलेका वार्ता निर्षकर्षविहीन भएपछि देउवाले दुई महामन्त्री थापा र शर्मालाई आज बिहान छलफलका लागि बोलाएका थिए ।

ठोस निर्णय नआएपछि महामन्त्रीहरूले निर्वाचन समितिलाई जानकारी गराएर निर्वाचन प्रक्रिया अघि बढाउने तयारी गरेका छन् ।

सभापतिसँग निर्णायक भनिएको वार्तामा सहमति नजुटेपछि विशेष महाधिवेशन पक्षधर निर्वाचनमार्फत नीति र नेतृत्व चयनको प्रक्रियामा अघि बढेको छ ।