पेइचिङ – चीनले पहिलोपटक कृत्रिम बौद्धिकता (एआई) मोडल सार्वजनिक गरेको छ, जसले मौसमको परिवर्तनले वित्तीय बजारमा पर्ने असर विश्लेषण गर्न सक्नेछ। चीन मौसम विभाग (सीएमए) का अनुसार, यो कदम जलवायु जोखिम व्यवस्थापनमा महत्वपूर्ण प्रगतिपूर्ण कदम हो।

‘शाङ्जी-१’ नामक मोडल शाङ्घाइस्थित फुदान विश्वविद्यालय र राष्ट्रिय मौसम सूचना केन्द्रले संयुक्त रूपमा विकास गरेका हुन्।

यस मोडलले मौसमसँग सम्बन्धित तत्वहरूले ‘स्टक’ मूल्यमा कस्तो असर पार्छन् भनेर मूल्याङ्कन गर्छ र लगानी निर्णय तथा वित्तीय जोखिम व्यवस्थापनमा नयाँ उपकरणको रूपमा प्रयोग गर्न सकिन्छ।

मुख्य विकासकर्ता झाओ यान्सियाका अनुसार, मोडलले विश्वव्यापी मौसम डेटा र चीनको ऐतिहासिक स्टक व्यापार डेटा प्रयोग गरेर ए-सेयर बजारका धेरै स्टकहरूको छोटो अवधिको प्रतिफल अनुमान गर्न सक्छ। परीक्षणले यो मोडल सौर्य उर्जा, पेट्रोकेमिकल, निर्माण र कृषि जस्ता उद्योगहरूलाई सही रूपमा पहिचान गर्न सक्षम रहेको देखाएको छ।

मोडलका आधारमा बनाइएका लगानी रणनीतिहरूले ऐतिहासिक अवधिमा स्थिर सकारात्मक प्रतिफल दिएको देखिएको छ।

फुदान विश्वविद्यालयका प्रोफेसर ली हाओका अनुसार, यस मोडलको प्रयोग कम्पनीले जलवायु जोखिम व्यवस्थापनमा, बैङ्कहरूले लगानी जोखिम नियन्त्रणमा र लगानीकर्ताले लगानीमा सहयोगको रूपमा गर्न सक्नेछन्।

अनुसन्धान टोलीले भविष्यमा यस मोडललाई प्रयोग गर्न र बजार गतिशीलतासँग मिलाएर निरन्तर अपडेट गर्ने योजना बनाएको छ।