काठमाडौं– लोकदोहोरी गीतमार्फत दर्शक तथा श्रोतामाझ परिचित गायिका रिता थापामगर अब नेपाली कांग्रेसको केन्द्रीय नेतृत्वमा पुगेकी छन् । 

कांग्रेसको १५औँ महाधिवेशनअन्तर्गत भएको निर्वाचनमा उनी खुला महिलातर्फ २ हजार ३०८ मत प्राप्त गर्दै केन्द्रीय सदस्यमा निर्वाचित भएकी हुन् ।

खुला महिलातर्फ १५ सदस्यका लागि ३६ जना उम्मेदवार प्रतिस्पर्धामा थिए । 

उक्त प्रतिस्पर्धामा सफलता हासिल गरेपछि रिताले सामाजिक सञ्जाल फेसबुकमार्फत खुसी व्यक्त गर्दै आफूलाई साथ र सहयोग गर्ने सबैप्रति आभार प्रकट गरेकी छन् ।

उनले यो जितलाई पद प्राप्तिमा मात्र सीमित नभई नेपाली कांग्रेसप्रतिको आफ्नो आस्था, राजनीतिक प्रतिबद्धता र सामाजिक उत्तरदायित्वसँग जोडिएको उपलब्धिका रूपमा व्याख्या गरेकी छन् । 

साथै, नेपाली कला, संस्कृति र लोकसङ्गीतको क्षेत्रमा आफूले गरेको यात्राका लागि पनि यो महत्त्वपूर्ण उपलब्धि भएको उनको भनाइ छ ।

दुई दशकभन्दा लामो समयदेखि लोकदोहोरी क्षेत्रमा सक्रिय रिता राष्ट्रिय लोक तथा दोहोरी गीत प्रतिष्ठानकी निवर्तमान अध्यक्षसमेत हुन् । 

गीतसङ्गीतको क्षेत्रमा आफ्नो पहिचान बनाएकी उनी अब पार्टीको केन्द्रीय नेतृत्वमा रहेर राजनीतिक जिम्मेवारीसमेत निर्वाह गर्नेछिन् ।