कञ्चनपुर- महाकाली नदीमा बेपत्ता भएका सशस्त्र प्रहरीका असई सागरराज थारूको शव पाँच दिनपछि फेला परेको छ ।

गत शनिबार दोधारा–चाँदनी झोलुङ्गे पुलसँगै चुँडिएको नेपाल टेलिकमको इन्टरनेट तार तान्ने क्रममा बोट अनियन्त्रित भएपछि थारू महाकाली नदीमा बेपत्ता भएका थिए ।

घटनापछि सशस्त्र प्रहरीको गोताखोर टोलीले लगातार खोजी गर्ने क्रममा पाँचौँ दिन आज उनको शव फेला पारेको हो । जिल्ला प्रहरी कार्यालय कञ्चनपुरका प्रहरी नायब उपरीक्षक टेकबहादुर रावतका अनुसार थारूको शव बेपत्ता भएको स्थानभन्दा १० देखि १५ मिटर दक्षिणतर्फ अड्किएको अवस्थामा भेटिएको हो ।

शव परीक्षणपछि परिवारको जिम्मा लगाइने रावतले जानकारी दिए ।

बर्दियाको ठाकुरबाबा नगरपालिका–६ का थारु बेपत्ता हुनुभन्दा अघिल्लो दिन मात्रै दोधारा–चाँदनीस्थित सशस्त्र प्रहरीको सीमासुरक्षा गुल्ममा हाजिर भएका थिए ।

दुई साताअघि दोधारा–चाँदनी जोड्ने झोलुङ्गे पुल भत्किएको थियो । पुलसँगै नेपाल टेलिकमको इन्टरनेट तारसमेत चुँडिएको थियो ।