एजेन्सी– साउदी अरेबियाको सरकारी तेल कम्पनी ‘साउदी अरामको’ को पूर्वी शहर धहरानस्थित प्रशासनिक भवनमा क्षेप्यास्त्र आक्रमण भएको छ । आक्रमणका कारण भवनमा सीमित आगलागी भएको साउदी ऊर्जा मन्त्रालयले जनाएको छ । 

सुरक्षा निकायहरूले मङ्गलबार राति नै स्थिति नियन्त्रणमा लिएका थिए भने घटनामा कुनै मानवीय क्षति वा कसैको मृत्यु नभएको मन्त्रालयले स्पष्ट पारेको छ । यद्यपि, कम्पनी स्रोतका अनुसार धहरानस्थित अरामको मुख्यालय परिसरमा ब्यालिस्टिक क्षेप्यास्त्र खसेको र त्यसबाट एउटा कार्यालय टावरको माथिल्लो तीन तल्लामा क्षति पुगी आगो लागेको थियो । 

उक्त परिसरमा अरामकोको मुख्य सञ्चालन केन्द्र रहेको छ, जसले अनसोर तथा अफसोर तेल कुवा, पाइपलाइन, रिफाइनरी र निर्यात टर्मिनलहरूको हेरचाह गर्दछ । घटनाका बेला स्थानीय बासिन्दाहरूले परिसर नजिकै ठूला विस्फोटका आवाज सुनेका थिए ।

यमनका इरान समर्थित हुथी विद्रोहीहरूले साउदी नेतृत्वको गठबन्धनविरुद्ध प्रतिशोध स्वरूप क्षेप्यास्त्र र ड्रोन प्रहार तीव्र पारेका छन् । साउदी गठबन्धनले धहरानमा खसालेको क्षेप्यास्त्रका टुक्राहरू आवासीय क्षेत्रमा खसेको जनाएको छ । 

यसैगरी, राजधानी रियाद र दक्षिणी क्षेत्रमा पनि प्रहार गरिएका ड्रोन तथा क्षेप्यास्त्रहरूलाई वायु रक्षा प्रणालीले नष्ट गरेको छ । रियादमा खसालेका दुई हुथी क्षेप्यास्त्रका टुक्रा आवासीय क्षेत्रमा खस्दा १५ वटा घरमा क्षति पुगेको र दुई महिला, एक पुरुष तथा एक बालक गरी चार जना घाइते भएका छन् । 

यसअघि हुथीका प्रवक्ता याह्या सारेले साउदी अरामकोको धहरान मुख्यालय र रियादस्थित रिफाइनरीलाई निशाना बनाउन सकिने भन्दै तेल मजदुरहरूलाई ती स्थानबाट टाढा रहन चेतावनी दिएका थिए ।

साउदी अरेबियाले यमनको राजधानी सानामा रहेको इन्धन डिपोमा गरेको आक्रमणको प्रतिक्रिया स्वरूप हुथीहरूले यो कारबाही गरेका हुन् । आक्रमणअघि साउदी युवराज मोहम्मद बिन सलमानको अध्यक्षतामा बसेको मन्त्रिपरिषद् बैठकले हुथीहरूलाई निरन्तर आक्रमणको परिणाम भोग्नुपर्ने चेतावनी दिएको थियो । 

बाब अल-मन्देब जलडमरूमध्य क्षेत्रमा हुथीहरूको प्रभाव बढेपछि साउदीले सैन्य अभियान पुनः तीव्र पारेको छ । साउदी अरेबियाले आफ्ना मित्रराष्ट्रहरूसँग सहयोगको माग गरे तापनि अमेरिकाले प्रत्यक्ष रूपमा युद्धमा सहभागी हुन अस्वीकार गरेको छ । यसैबीच, इरानका विदेशमन्त्री अब्बास अराघ्चीले साउदी अरेबिया र हुथी विद्रोहीहरूबीच मध्यस्थता गर्न इरान तयार रहेको प्रस्ताव अघि सारेका छन् ।