काठमाडौँ- नेपालका बाढीप्रभावित दुर्गम क्षेत्रमा राहत सामग्री पुर्‍याउनका लागि सशस्त्र प्रहरी बललाई अत्याधुनिक अमेरिकी व्यावसायिक कार्गो ड्रोन हस्तान्तरण गरिएको छ । नियोग प्रमुख स्कट अर्बोम, सार्वजनिक मामिला प्रमुख माइक हार्कर र क्षेत्रीय सुरक्षा अधिकारी विल भनले सशस्त्र प्रहरी बल र सेभेन समिट ट्रेक्सको उपस्थितिमा ‘फ्रि फ्लाई अल्टा एक्स जेन२’ नामको उक्त ड्रोन हस्तान्तरण गरेका हुन् ।

कठिन भूबनोटका कारण पहुँच पुग्न नसकेका प्रभावित समुदायसम्म अत्यावश्यक आपूर्ति पुर्‍याउन सशस्त्र प्रहरीले यो ड्रोनको प्रयोग गर्नेछ । यसअघि अमेरिकी दूतावासको ‘एसेन्ट समिट’ अन्तर्गत सेभेन समिट ट्रेक्सले आमादाब्लम हिमालमा यस ड्रोनको सफल परीक्षण गरिसकेको छ ।

अत्यधिक प्रतिकूल मौसम र कठिन परिस्थितिमा पनि उच्च शिविरहरूबीच अक्सिजन सिलिन्डर र पर्वतारोहणका सामग्रीहरू ओसारपसार गरेर यसले आफ्नो क्षमता सिद्ध गरेको थियो । एभरेस्ट क्षेत्रमा गरिएको उक्त उच्च-उचाइ परीक्षणले नेपालको सबैभन्दा चुनौतीपूर्ण भूभागमा अमेरिकी प्रविधिको व्यावहारिक प्रयोगलाई स्पष्ट रूपमा देखाएको थियो ।

बाढीप्रभावित समुदाय र परिवारका लागि अमेरिकाले गर्दै आएको बृहत् सहयोगकै एक महत्वपूर्ण अंशका रूपमा यो ड्रोन हस्तान्तरणलाई लिइएको छ । यसबाहेक अमेरिकाले नेपालका बाढीपीडितका लागि मानवीय सहायता, सामग्री व्यवस्थापन (लजिस्टिक), फरेन्सिक, कन्सुलर तथा अन्य प्राविधिक सहयोगसमेत निरन्तर प्रदान गर्दै आएको छ ।