काठमाडौँ – नेकपाका संयोजक पुष्पकमल दाहाल ‘प्रचण्ड’ ले भोटेकोशीमा आएको प्रलयकारी बाढीका कारण ठूलो जनधनको क्षति भएकाले यस वर्षको हरितालिका तीज संयम, संवेदना र सामाजिक उत्तरदायित्वका साथ मनाउन आग्रह गरेका छन्।

तीज पर्वका अवसरमा सोमबार शुभकामना सन्देश जारी गर्दै अध्यक्ष प्रचण्डले बाढीको विनाशले निम्त्याएको दुःखद घडीमा विगतका वर्षहरूझैँ उल्लासका साथ तीज मनाउने अवस्था नरहेको उल्लेख गरेका छन्।

“दुःखमा रहेका परिवारप्रति ऐक्यबद्धता जनाउँदै पीडितको उद्धार, राहत र पुनःस्थापनामा आ–आफ्नो ठाउँबाट सहयोग गरौँ,” अध्यक्ष प्रचण्डले सन्देशमा भनेका छन्, “हाम्रो संवेदना र संयमलाई राष्ट्रिय एकताको शक्तिमा बदलौँ।” उनले विपत्को यस समयमा सम्पूर्ण दिदीबहिनी तथा आमाहरूलाई संयमित भएर पर्व मनाउन अपिल गर्दै हरितालिका तीजको शुभकामना व्यक्त गरेका छन्।